Օդի վիտամիններ
Մարդն իր գիտակցության մեջ վիտամինները զուգորդում է պտուղ-բանջարեղենի, մթերքի կամ դեղատնից գնված վիտամինային հաբերի հետ: Սակայն գոյություն ունեն նաև աչքի համար ոչ տեսանելի, առանց համի ու հոտի վիտամիններ. դրանք օդի մեջ են, թթվածնի իոններով լիցքավորված մոլեկուլներում: Օդը մարդու կյանքում աննկարագրելի դեր է կատարում. բարձրացնում է իմունիտետը , օժտված է նաև հզոր հակաօքսիդանտ ազդեցությամբ:

Յուրաքանչյուրը գիտի, որ երբ գլխապտույտ կամ աշխատունակության անկում է առաջանում, ապա առաջին օգնությունը մի կում մաքուր օդն է:

Կյանքի շունչը

Առաջինն, ով նկատել է լիցքավորված օդի ազդեցությունը մարդու օրգանիզմի վրա, Լոմոնոսովն էր: Սակայն առաջինն ակադեմիկոս Ալ. Չիժևսկին էր, որ ապացուցեց դրական ու բացասական իոնների ազդեցությունը հիվանդ ու առողջ օրգանիզմի վրա: «Բնակարան կառուցելով` մարդը զրկել է իրեն իոնացված օդից, իր բնական շնչառական միջավայրն աղավաղել է ու բնության հետ օրգանիզմը հակասության մեջ դրել: Քաղաքաբնակները կյանքի 90%-ն անց են կացնում շենքի ներսում ու աստիճանաբար կորցնում իմունային ուժերը, հիվանդանում են ու ժամանակից շուտ ծերանում»:

Անիոնները կամ բացասական լիցքով մասնիկները կենսականորեն անհրաժեշտ են օրգանիզմին: Դրանց գոյությունը մենք զգում ենք բնության գրկում, լեռներում, ծովի մոտ, անձրևից հետո, երբ լիաթոք շնչելու անհագ ցանկություն է առաջանում: Անիոններն անվանում են «օդի վիտամիններ»: Դրանք բուժում են բրոնխների ու թոքերի հիվանդությունները, բարձրացնում իմունիտետը և կանխարգելիչ հզոր միջոց են համարվում, նպաստում են օդը փոշուց մաքրելուն` մանրէների թիվը հասցնելով նվազագույնի: Բացասական անիոնները տևական մաքրող ազդեցություն ունեն օդի միկրոֆլորայի վրա:


Բազմաթիվ էլեկտրաչափական դիտարկումները ցույց են տվել, որ 1 սմ3 անտառի օդում 700-1500 անիոն կա, իսկ խոշոր քաղաքներում` 150-200, շենքերում այդ թիվը նվազում է մինչև 25 անիոն: Ահա թե ինչու են էկոլոգները տագնապում: Բանն այն է, որ եթե 1 սմ3-ում անիոնների քանակը 1000-ից պակաս է, ապա վատանում է ինքնազգացողությունը, հիվանդանում ենք, տառապում գլխացավից, թուլություն, հոգնածություն զգում:


Անիոնների ազդեցությամբ օրգանիզմում ակտիվանում են ֆերմենտները, էնզիմները, վիտամիններն ու հորմոնները:


Օդը, դրսից տուն մտնելով, կորցնում է իր որակական հատկությունները, իսկ օդորակիչները թարմ օդի տպավորություն են ստեղծում, ինչը, սակայն, երբեք չի կարող բնական օդին փոխարինել: Բանն այն է, որ սենյակում ու շենքում օդն այլևս կենսաբանորեն ակտիվ չէ, իոնացված չէ: Իսկ այսօր առավելություն համարվող հերմետիկ ապակիները նվազեցնում են օդափոխանակության հնարավորությունը:


Ժամանակակից մարդն իր կյանքի մեծ մասն անց է կացնում փակ տարածքներում ու շնչում առողջության համար վտանգավոր նյութերի մեծ խտություն ունեցող օդ: Այսօր դա խնդիր է թե՛ քաղաքային բնակարանի, թե՛ աշխատավայր-գրասենյակի և թե՛ քաղաքից դուրս գտնվող տան պարագայում:


Ուսումնասիրելով փողոցում ու տանը ստեղծված էկոլոգիական վիճակը` գիտնականները հանգել են այն եզրակացության, որ տան օդը 6-7 անգամ գերազանցում է դրսի օդին` թունավորության մակարդակով ու, բնականաբար, նպաստավոր միջավայր ստեղծում հիվանդությունների զարգացման համար :


Մարդն օրվա ընթացքում 24 կգ օդ է շնչում: Փակ տարածքում փոշեմասնիկների խտությունը 5 անգամ ավելի է, քան ամենաբանուկ փողոցներում: Ու, եթե հաշվի առնենք, որ մարդը 22 հազար անգամ օդ է ներշնչում, ու ամեն անգամ օրգանիզմ է ընկնում միջինը 55 հազար փոշեհատիկ, ապա ստացվում է, որ մեր շնչառական համակարգն օրական 2 ճաշի գդալ փոշի է շնչում: Մեկ տարում յուրաքանչյուր բնակիչ 30 կգ փոշի է հավաքում իր բնակարանից: Ապացուցված է, որ փակ տարածքում ինֆեկցիոն հիվանդություններով վարակվելու հավանականությունը 5-8 անգամ ավելի է: Բացի այդ, տնային փոշու մեջ բորբոսասնկեր ու սպորներ կան:


Սենյակի օդը կեղտոտվում է ու դրան նպաստող գործոններ են.

  • սենյակի նորմալ օդափոխանակությանը խոչընդոտող սինթետիկ նյութերի առատությունը,
  • կահույքը, հագուստը, կոշիկը, գորգերը,
  • զուգարանների օդը,
  • ինքը` մարդը, շուրջ 400 քիմիական միացություն է արտադրում շրջակա տարածք (ածխաթթու գազ, ջրի գոլորշի, եթերանյութեր, որոնք օրգանիզմում կատարվող կենսաքիմիական գործընթացների արգասիք են),
  • տնային կենդանիների հոտը,
  • ջեռուցման ու գազասարքերի շահագործման խախտման արգասիքները,
  • խոհանոցի շահագործումը (հատկապես երբ այրվում է սնունդը կամ փչանում),
  • ջրատար ու կոյուղու համակարգում խցանումները,
  • տնային փոշին,
  • լուրջ աղտոտում է նաև ծխախոտի ծուխը,
  • սենյակում նաև նյութերի քայքայման հոտ է լինում (շինանյութի` բետոն, ներկ, քար ու աղյուս), որոնցով կառուցված է տունը, ժամանակի ընթացքում ֆիզիկական ու քիմիական քայքայման են ենթարկվում (քիմիականի դեպքում օդի մեջ գազեր են կուտակվում, իսկ ֆիզիկականի դեպքում` այդ նյութերի մանրագույն մասնիկներ),
  • կենցաղային քիմիայի միջոցներ (լվացքի միջոցներ, որոնք պետք է պահվեն պինդ փակվող ամանի մեջ),
  • ինտերիերի ոչ գրագետ կազմակերպումը,
  • սենյակի օդը թունավոր կոկտեյլի է վերածում հեռուստացույցի, համակարգչի, կենցաղային տեխնիկայի առկայությունը,
  • կենդանիներ ունեցողներն իրենց չեն ծանրաբեռնում տարրական հիգիենայի կանոններով. կենդանիների արտաթորանքը չորանալով մշտապես «թևածում» է օդում:

Իրավիճակը շտկելու համար պետք է մի քանի տարրական կանոնի հետևել.

  • կանոնավոր կերպով օդափոխել սենյակը,
  • դեն նետել հնոտիքը,
  • հաճախակի խոնավ մաքրություն իրականացնել,
  • նվազեցնել փոշին կուտակող նյութերի քանակը (վարագույր, գոբելեն, գորգ ու ավելորդ իրեր),
  • ժամանակ առ ժամանակ մաքրություն իրականացնել նաև նկուղներում, աստիճանավանդակում, իսկ տանը պետք է հետևել, որ սննդային մնացորդներ չկուտակվեն,աղբամանը պետք է փակ բերան ունենա, բայց և հաճախակի պետք է դրա պարունակությունը դատարկել, իսկ աղբամանը ժամանակ առ ժամանակ լվանալ ու ախտահանել:

Մարդը հիմնականում հիվանդանում է աղտոտված օդի հետևանքով կամ այդ օդի պատճառով խորանում են հիվանդությունները:
Հետևաբար, շենքում, սենյակներում միշտ` տարվա բոլոր եղանակներին, պետք է ապահովել բնական օդի ներթափանցումը:

Նյութը՝ http://www.med-practic.com