Այսօր «Արմենիա Մարիոթ» հյուրանոցում նոր էլեկտրոնային պարբերականի շնորհանդեսն էր: «Երիտասարդ» էլեկտրոնային լրատուն կարելի է գտնել համացանցի միանգամից մի քանի հասցեներով` www.eritasard.am, www.erit.am, www.youth.am, www.youthweb.am, www.youtharmenia.am, www.eritasard.net:

Պարբերականն աշխատելու է կոնկրետ թիրախային լսարանի համար. «Երիտասարդում» տեղ գտած նյութերը երիտասարդների մասին են, երիտասարդների համար, նրանց լեզվով:

«2010 թ-ի երիտասարդության քաղաքականության գործունեության հիմնական ծանրության կենտրոնը լինելու են մարզերը: Այս առումով ոչ նյութական ինֆորմացիայի հասանելիությունն ապահովելու ամենալավ ձեւը թերեւս էլեկտրոնային կայքն է»,- նշեց ՀՀ սպորտի եւ երիտասարդության հարցերի փոխնախարար Արսեն Քարամյանը:

Փոխնախարարը տեղեկացրեց, որ երիտասարդական կայքի բացմամբ մեկնարկում է գործողությունների մի ամբողջ շարք, որն ուղղված է համահայկական երիտասարդական պորտալի ձեւավորմանը:

«Հայաստանի երիտասարդ կանանց ասոցիացիա» ՀԿ-ի նախագահ Լիլիթ Ասատրյանը կարծում է, որ «Երիտասարդ»-ը հայ երիտասարդության համար թերեւս ամանորյա ամենալավ նվերն է:

«Հրաշալի ծրագիր է, առաջընթացի նոր հնարավորություն, բայց չպետք է մոռանալ, որ մարզերում երիտասարդների զգալի մասի համար համակարգիչն ու համացանցը հասանելի չեն: Մյուս կողմից, սակայն, հատկապես մարզային երիտասարդների շրջանում սա կարող է նաեւ նպաստել տեղեկատվական այս միջոցի տարածմանը»,- ավելացրեց Լիլիթ Ասատրյանը:

«Երիտասարդության քաղաքականության հիմնական խնդիրներից մեկը տեղեկացվածության ոչ բավարար մակարդակն է: Կարծում եմ` կայքի ճիշտ կիրառումն ու իր նպատակին ծառայելն այս խնդրի լուծման հարցում լուրջ ներդրում կարող են ունենալ: Խիստ կարեւոր է, որ հետագայում կայքը նաեւ ֆորումի հնարավորություն ընձեռի»,- ասաց ՀՀ մշակույթի փոխնախարար Արթուր Պողոսյանը: Ըստ նրա` ֆորումը ոչ միայն այսօրվա երիտասարդության ժամանցի մի մասն է, այլեւ բազմաթիվ խնդիրների օպերատիվ եւ արագ քննարկման իրական հնարավորություն:

«Ազատ հասարակության ինստիտուտ» ՀԿ-ի նախագահ Էդգար Հակոբյանը կարծում է, որ նոր պարբերականը հայ երիտասարդներին համախմբելու հրաշալի միջոց է:

Կայքի խմբագիր Կարեն Գրիգորյանը նշեց, որ կայքի կառուցվածքը վերջնական չէ, եւ այն պարբերաբար կթարմացվի: Այս գործընթացում իր անմիջական մասնակցությունը կարող է ունենալ նաեւ ընթերցողը. առաջարկություններն ու հուզող հարցերը խմբագրակազմին կարելի է փոխանցել հեռախոսի կամ էլեկտրոնային փոստի միջոցով:

Պատկերասրահ