Նյութը՝ Դավիթ Գրիգորյանի
Լուսանկարները՝ համացանցից
Տեղադրվել է 31-07-2017
4-րդ «Ֆրեսկո»-ն կմեկնարկի օգոստոսի 25-ից
Օգոստոսի 25-ից կմեկնարկի «Ֆրեսկո» արդի արվեստի եւ հոգեւոր ֆիլմերի չորրորդ միջազգային փառատոնը՝ Հայաստանը 14 օր շարունակ վերածելով մշակութային ժողովրդական Փառա-ՏՈՆԻ:

Ֆրեսկոն կանցկացվի թե՛ Երեւանի սրտում, թե՛ մարզերի պատմամշակութային վայրերում: Կարապի լճի տարածքում, զուգահեռ Երեւանի պուրակներում, ինչպես նաեւ մշակութային դահլիճներում բացօթյա կինոդիտումներ, համերգներ, կինոճամբարներ,  վարպետության դասեր . «առանց տոմսի» ձեւաչափով միջոցառումները կդառնան հայաստանյան ամառվա վերջին տասնօրյակի անբաժան մասը: 

Անակնկալ է սպասվում բնության սիրահարներին՝ փառատոնի վրանային կինոճամբարը նախատեսվում է  Հայաստանի ամենաչքնաղ անկյուններից մեկում՝ Լոռու մարզի համաշխարհային ժառանգության ցուցակում ընդգրկված վայրերում՝ Հաղպատի, Սանահինի, Հաղարծնի Ախթալա եւ Քոբայրի վանքերի տարածքում: Այս խորհրդավոր վայրերում մշակութային ճամբարի մասնակիցները, զբոսաշրջիկները՝ համայնքի բնակիչների հետ միասին, հնարավորություն կունենան դիտելու համաշխարհային կինոարվեստի այն ֆիլմերը, որոնք ժխտում են էկոլոգիական աղետները, բռնությունը, քարոզում  մարդասիրություն, խաղաղություն, հայրենասիրություն,  ուղղված են վերականգնելու ընտանեկան եւ առհասարակ հոգեւոր արժեքները: Այս տարի «Ֆրեսկո»-ի ֆիլմացանկում ներառված է 25  երկրներից 42 նոր կինոժապավեն: 

Իսկ Հաղպատի հանրահայտ խոհարար Ա. Քեֆոյանը մասնակիցներին եւ հյուրերին կծանոթացնի «Հայկական խոհանոցի ավանդական մշակույթ»-ին եւ բոլորի հետ միասին Հաղպատի բարիքներից կպատրաստի Ագապե՝ սիրո ճաշ:

Հետաքրքիր հանդիպումներ են սպասվում նաեւ լուսանկարչության սիրահարներին, մայրաքաղաքում եւ մարզային ճամբարում կլինեն լուսանկարչության վարպետության դասեր: Արդեն հայաստանցիների կողմից շատ սիրված Իսրայելացի լուսանկարիչ Դ. Բրիկմանը եւ Ճապոնացի լուսանկարիչ Հայատո Մացումոտոն կներկայացնեն իրենց երկրների մշակույթն ու ավանդույթները եւ կկիսվեն իրենց մասնագիտական հմտություններով:

Փառատոնն այս տարի ունի նաեւ հատուկ ծրագիր՝ «Հետադարձ  հայացք» խորագրով, որտեղ կնեկայացվեն հայ մտավորական, ամենաինքնատիպ դեմքերից մեկի՝ կինովավերագրող Արա Վահունու ֆիլմերը:

Իսկ ԱՄՆ –ից եւ Կանադայից ժամանած վավերագրական ֆիլմերի մասնագետներ՝ Օդրի Էմերսոնի (ԱՄՆ) եւ ՝ Պասկալ Ժելինասի (Կանադա) կտան վարպետության դասեր հայ կինոարվեստի ներկայացուցիչների եւ կինոսերների համար:

Նշենք նաեւ, որ արդեն ավանդույթ դարձած փառատոնի ամենամյա հազարովոր հուշանվերները այս տարիի եւս կպատրաստեն փառատոնի նվիրյալ կամավորները՝ Խարբերդի մասնագիտացված մանկատան սաների գլխավորությամբ:

Փառատոնի բացմանն ընդառաջ  Օգոստոսի 23-ին եւ 24-ին  Կարապի Լճի տարածքում կցուցադրվեն Ֆրեսկոյի նախորդ տարիների լավագույն մրցանակակիր ֆիլմերը: