Նյութը՝ SPRING PR-ընկերության
Լուսանկարները՝ SPRING PR-ընկերության
Տեղադրվել է 13-10-2017
Ցեյլոնյան թեյի աշխարհահռչակ վարպետ Մերրիլլ Ջեյ Ֆերնանդոն Հայաստանում
Հոկտեմբերի 12-ին Երեւանում տեղի ունեցավ ԶԼՄ-ի ներկայացուցիչների համար կազմակերպված հանդիպում - թեյախմություն ցեյլոնյան թեյի վարպետ, Դիլմահ թեյերի հիմնադիր, աշխարհահռչակ Մերրիլլ Ջեյ Ֆերնանդոյի հետ:

Միջոցառման ընթացքում Մերրիլլ Ջեյ Ֆերնանդոն անմիջական շփման մթնոլորտում պատմեց իր անցած ուղղու, դժվարությունների հաղթահարման եւ ներկայիս գործունեության մասին: Նա լրատվամիջոցներին ծանոթացրեց նաեւ ցեյլոնյան թեյերի պատմությանը, առանձնահատկություններին, դրանց աճեցման, բաղադրության, համային հատկանիշների եւ թեյախմության գաղտնիքներին:
Ասուլիսի ընթացքում ցուցադրվեց Մերրիլլ Ջեյ  Ֆերնանդոյի կյանքի մանրամասներն ու գործունեությունը  ներկայացնող ֆիլմ:

Մերրիլլ Ջեյ Ֆերնանդոն ակտիվ բարեգործական գործունեություն է ծավալում ինչպես Շրի Լանկայում, այնպես էլ դրա սահմաններից դուրս՝ այդ թվում Հայաստանում: Նրա խոսքերով Դիլմահը ստեղծվել է «ծառայեցնել բիզնեսը հանուն մարդկության» փիլիսոփայության հիման վրա:

«Իմ բիզնեսը հաջողվել է, որովհետեւ ստացվող գումարը ես միշտ կիսել եմ կարիքավոր մարդկանց հետ: Մենք այս ձեւով ենք ապրում: Ես եւ ընտանիքս երջանիկ ենք, որ Աստծո շնորհը իջել է մեզ վրա, եւ մենք վստահ ենք, որ պետք է կիսենք այն նրանց հետ, ովքեր ունեն դրա կարիքը: Այս անգամ մենք մտադրվել ենք օգնության ձեռք մեկնել Գյումրիում բնակվող մարդկանց: Մենք գիտենք, որ այնտեղ մարդիկ կան, ովքեր տուժել են երկրաշարժի արդյունքում եւ հիմա Գյումրիում տներ են կառուցում տուժածների համար: Մենք ցանկանում ենք օգնել այդ մարդկանց»-, ասաց Մերրիլլ Ջեյ Ֆերնանդոն:

Մերրիլլ Ջեյ Ֆերնանդոն Հայաստան այցի շրջանակում «Գյումրին առանց տնակների» հիմնադրամին ցուցաբերեց աջակցություն, շնորհիվ որի եւս մեկ անօթեւան ընտանիք կունենա բնակարան:

Թեյի գուրուն նշեց, որ սա իր երկրորդ այցն է Հայաստան եւ շատ ուրախ է, որ  այստեղ է, քանի որ այն գեղեցիկ երկիր է, մարդիկ շատ լավն են, հոյակապ  է նաեւ հյուրասիրությունը: Մերրիլլ Ջեյ Ֆերնանդոն ասաց, որ Հայաստանը հիշեցնում է իր երկիրը:

Մերրիլլ  Ջեյ Ֆերնանդոն ծնվել է 1930 թվականին Շրի Լանկայում: Նա եղել է առաջին մարդը Շրի Լանկայից, ով ուսումնասիրել է թեյի ու թեյախմության տեխնիկան Լոնդոնում: Ցեյլոնական թեյը միշտ համարվել է լավագույնը, սակայն այդ տարիներին թեյը ներկրվում էր Լոնդոն եւ դրվում աճուրդի: Թեյը ներկայացվում էր որպես հումք, ինչը ձեռնտու էր եվրոպացի գործարարներին: Երիտասարդ եւ ամբիցիոզ դեգուստատորը հեղափոխում է ոլորտը: 1980-ական թվականներին Ֆերնանդոն, իր բոլոր ռեսուրսներն օգտագործելով, ձեռք է բերում թեյի իր՝ առաջին փաթեթավորման սարքը եւ 1988 թվականին եվրոպայի գուրմաններին ցեյլոնական թեյը առաջարկում է Դիլմահ բրենդի ներքո: Այժմ Դիլմահ թեյերը հասանելի են աշխարհի 250 երկրներում:  

Դիլմահը ստեղծվել է ծառայեցնել բիզնեսը հանուն մարդկության փիլիսոփայության հիման վրա, որն իրականացվում է Մերրիլլ Ջեյ Ֆերնանդոյի «MJF» բարեգործական հիմնադրամի եւ Dilmah Conservation-ի կողմից: Մարդասիրական գործունեության շնորհիվ 2015 թվականին Օսլոյում Խաղաղության Նոբելյան մրցանակակիրների կոմիտեյի կողմից Ֆերնանդոն արժանացել է «Բիզնեսը խաղաղության համար» մրցանակի: 

Յուրաքանչյուր թեյի փաթեթ վերահսկվում է անմիջապես պրն. Ֆերնանդոյի կողմից, ով ունի ավելի քան 60 տարվա փորձ: Նրան այժմ միացել են նաեւ իր որդիները` Դիլհան ու Մալիկը, որոնց անունով էլ անվանվել է բրենդը: