Նյութը՝ «Հայաստանի Հանրապետություն» օրթերթի
Լուսանկարները՝ «Հայաստանի Հանրապետություն» օրթերթի
Տեղադրվել է 2020-06-22 17:12
ԱՌԱՆՑ ԱՐՑԱԽԻ ՄԱՍՆԱԿՑՈՒԹՅԱՆ ԲԱՆԱԿՑԱՅԻՆ ԳՈՐԾԸՆԹԱՑՈՒՄ ՉԻ ԿԱՐՈՂ ԷԱԿԱՆ ԱՌԱՋԸՆԹԱՑ ԼԻՆԵԼ
Երեւանում տեղի է ունեցել ՀՀ եւ ԱՀ անվտանգության խորհուրդների համատեղ նիստը

Հայաստանի Հանրապետության վարչապետ Նիկոլ Փաշինյանի եւ Արցախի Հանրապետության նախագահ Արայիկ Հարությունյանի համանախագահությամբ Երեւանում տեղի է ունենում Հայաստանի եւ Արցախի Անվտանգության խորհուրդների համատեղ նիստը։ Նիստին ներկա են նաեւ Հայաստանի եւ Արցախի խորհրդարանների նախագահներ՝ Արարատ Միրզոյանը եւ Արթուր Թովմասյանը։

Մինչ օրակարգային հարցերին անցնելը՝ Նիկոլ Փաշինյանը եւ Արայիկ Հարությունյանը հանդես են եկել ելույթներով։

Իր խոսքում վարչապետ Փաշինյանը, մասնավորապես, նշել է. «Արցախի Հանրապետության մեծարգո նախագահ, Հայաստանի եւ Արցախի Ազգային ժողովների մեծարգո նախագահներ, անվտանգության խորհրդի հարգելի անդամներ, այսօր տեղի է ունենում Հայաստանի եւ Արցախի անվտանգության խորհուրդների 4-րդ նիստը, եւ սա այլեւս հաստատված մի ձեւաչափ է, որտեղ քննարկվում են Հայաստանի եւ Արցախի անվտանգության օրակարգի ամենատարբեր հարցեր։ Այսօրվա նիստը պայմանավորված է նրանով, որ Արցախում ձեւավորվել է նոր իշխանություն, Անվտանգության նոր խորհուրդ է ձեւավորվել, եւ մենք կարեւոր ենք համարում, որ Արցախի մեր գործընկերները հնարավորինս արագ ներգրավվեն այս աշխատանքներում։

Նախ թույլ տվեք Արցախի անվտանգության խորհրդի բոլոր անդամներին շնորհավորել նշանակման կապակցությամբ։ Հայաստանի անվտանգության խորհուրդը նույնպես նոր անդամներ ունի, եւ նրանք նույնպես առաջին անգամ են մասնակցում այս ձեւաչափով քննարկումներին, եւ նրանց նույնպես շնորհավորում եմ այս առիթով։

Այս համատեղ նիստի ընթացքում կարեւոր եմ համարում մի քանի դիտարկումներ կատարել հարցերի երեք խմբի առնչությամբ, որոնք ես պայմանականորեն կսահմանեի որպես բանակցային գործընթացին Արցախի մասնակցության, բանակցությունների բովանդակային հատվածի հանդեպ մեր մոտեցումների եւ խաղաղ գործընթացի միջավայրի հարցեր։
Անցած տարվա դեկտեմբերի 23-ին մեր համատեղ նիստի ընթացքում ես առանձնահատուկ կարեւորեցի Արցախում անցկացվելիք համապետական ընտրությունները։ Արցախում կայացած ընտրությունները հետապնդում էին երեք առաջնահերթ նպատակ։ Առաջին՝ հնարավորություն տալ Արցախի ժողովրդին մարդու իրավունքների իրացմամբ ընտրել այն իշխանություններին, որոնք կկազմակերպեն երկրի քաղաքական եւ հասարակական կյանքը։ Երկրորդ՝ հնարավորություն տալ Արցախի ժողովրդին ընտրել այն իշխանություններին, որոնք պետք է ապահովեն իր անվտանգությունը։ Հայաստանի Հանրապետությունը, իհարկե, կշարունակի աջակցել Արցախի իշխանություններին Արցախի բնակչությանը պաշտպանելու իրենց հանձնառության մեջ՝ շարունակելով լինել Արցախի անվտանգության երաշխավորը։ Երրորդ՝ Արցախի ժողովուրդը նախագահական եւ խորհրդարանական ընտրությունների արդյունքում պետք է մանդատ տար իր իշխանություններին՝ ներկայացնելու Արցախը նաեւ բանակցային սեղանին։

Այժմ, երբ ընտրություններն ավարտվել են, իսկ իշխանությունները ձեւավորվել, պետք է փաստել, որ այս երեք նպատակները լավագույնս կատարվել են։ Մրցակցային եւ ժողովրդավարական ընտրությունների արդյունքում Արցախն ունի իշխանություն, որն արտահայտում է քաղաքական բարեփոխումների, տնտեսական եւ ենթակառուցվածքային զարգացման արցախցիների ձգտումները։ Ընտրությունների եւ դրանց հետեւած իշխանությունների կազմավորման արդյունքում Արցախում տեղի ունեցավ քաղաքական ուժերի համերաշխության եւ համախմբման կարեւորագույն գործընթաց, ինչը, վստահ եմ, առավել ամրապնդեց Արցախի անվտանգությունը։

Վերջապես, ընտրություններն ընդգծեցին Արցախի ժողովրդի եւ նրա կողմից ընտրված իշխանության դերը խաղաղ կարգավորման գործընթացում։ Ակնհայտ է, որ առանց Արցախի իշխանությունների լիարժեք ներգրավման՝ բանակցային գործընթացում չի կարող լինել էական առաջընթաց, քանի որ յուրաքանչյուր առաջընթացի համար անհրաժեշտ է կարեւորագույն պայմանավորվածությունների ձեռքբերման եւ իրացման կարողություն, եւ այստեղ է, որ Արցախի իշխանությունների ստացած ժողովրդական մանդատն անփոխարինելի է։
Արցախի իշխանությունների ներգրավումը բանակցությունների բովանդակային հարցերում օբյեկտիվ անհրաժեշտություն է, որից խուսափելն առավել կձգձգի առանց այն էլ ձգձգված հակամարտությունը։ Ակնհայտ է, որ հակամարտության կողմերն ունեն իրարամերժ դիրքորոշումներ առանցքային մի շարք հարցերում, եւ եթե անկեղծ լինենք, ապա շատ ավելի հեշտ է ասել որ հարցերում համաձայն չենք Ադրբեջանի հետ, քան որ հարցերում կարող ենք համաձայնության հասնել։ Նման իրավիճակն առերեւույթ ունի բազմաթիվ պատճառներ, բայց եթե մի պահ փորձենք դրանք ընդհանրացնել, ապա ակնհայտ է դառնում, որ մենք բախվում ենք երկու հիմնական խնդրի։

Առաջին խնդիրն արդեն նշեցի, այն վերաբերում է Արցախի իշխանությունների հետ բանակցելու Ադրբեջանի ներկայիս իշխանությունների դժկամությանը։ Ինչո՞ւ եմ շեշտում ներկայիս, որովհետեւ այս դահլիճում կան մարդիկ, որոնք ոչ միայն բանակցել, այլեւ փաստաթղթեր են ստորագրել Ադրբեջանի նախկին, ավելի ճիշտ այն ժամանակվա իշխանությունների հետ, ընդ որում՝ նաեւ Հեյդար Ալիեւի նախագահության շրջանում։
Երկրորդ՝ Ադրբեջանը չի հրաժարվում առավելապաշտական կեցվածքից եւ դիտարկում է խաղաղ գործընթացը որպես իր բոլոր պահանջների աստիճանական կատարման միջոց։ Այսինքն, ոչ թե փոխզիջման հասնելու միջոց, այլ իր բոլոր պահանջների աստիճանական կատարման միջոց։ Այդպես չի լինում եւ չի լինելու, բանակցային գործընթացը մեկ կամ երկու ընդմիջում ունեցող պատվերով համերգ չէ, խաղաղությունը ենթադրում է փոխզիջման հասնելու պատրաստակամություն եւ համապարփակ լուծումներ։

Հենց այդ պատրաստակամությունը նկատի ունենալով՝ ես առաջ էի քաշել այն բանաձեւը, որի համաձայն՝ Արցախի հարցի որեւէ լուծում պետք է ընդունելի լինի Ղարաբաղի ժողովրդի համար, Հայաստանի ժողովրդի համար եւ Ադրբեջանի ժողովրդի համար։ Այս բանաձեւը ոչ այլ ինչ է, քան փոխզիջման հնարավորությունն ընդունելու առաջարկ։ Կրկնում եմ՝ հնարավորությունն ընդունելու առաջարկ, այլ ոչ թե կոնկրետ փոխզիջման ընդունում, որը դեռեւս հեռու է ձեւավորված լինելուց իմ նշած պատճառներով։

Չընդունելով իմ առաջարկը՝ Ադրբեջանի նախագահը չի ընդունում ընդհանրապես որեւէ փոխզիջման հնարավորություն։ Եվ ուրեմն ակնհայտ է, որ մենք չենք կարող նման մոտեցումներով ակնկալել բանակցային գործընթացում իրական առաջընթաց, հատկապես, երբ դրանք ուղեկցվում են պատերազմի սպառնալիքներով կամ հայ ժողովրդի հանդեպ տարածքային կամ պատմական ուղղակի կամ անուղղակի պահանջներով։ 
Ղարաբաղյան հակամարտությունն անժամկետ հայ-ադրբեջանական լայնածավալ թշնամության վերածելու փորձերը, որտեղ մեր ժողովուրդները միմյանցից կվիճարկեն ամեն ինչ՝ անցյալը, ներկան, ապագան եւ ողջ տարածաշրջանը, վստահ եմ՝ չի բխում ո՛չ հայ, ո՛չ էլ ադրբեջանցի ժողովրդի շահերից։ Մարդու իրավունքների եվրոպական դատարանի՝ Ռամիլ Սաֆարովի գործով դատավճիռը հստակ արձանագրեց եւ դատապարտեց Ադրբեջանում հայերի հանդեպ ատելության հողի վրա կատարվող հանցանքների խրախուսումը։ Այս դատավճիռը պետք է սահմանի հստակ կարմիր գծեր Ադրբեջանի համար՝ ցույց տալով, որ այդ կարմիր գծերից անդին կանգնած են ոչ միայն Հայաստանը եւ հայ ժողովուրդը, այլեւ միջազգային հանրությունը։

Քանի որ վերջին շրջանում Ադրբեջանի նախագահը սիրում է անդրադառնալ պատմությանը, ես նույնպես կցանկանայի ձեւակերպել իմ միտքը որոշակի պատմական օրինաչափության մատնանշմամբ։ Իր պատմության ողջ ընթացքում, այսինքն՝ վերջին 100 տարում, Ադրբեջանը ենթարկվել է 2 մեծ փորձությունների՝ 1920 թվականի ապրիլին, երբ Ադրբեջանը կորցրեց իր՝ 2 տարի առաջ ձեռք բերած պետականությունը, եւ 1993 թվականի հունիսին, երբ Ադրբեջանը վերստին մոտեցել էր 2 տարի առաջ ձեռք բերված պետականության կորստի եզրագծին, ինչի մասին մեզ այսօր հիշեցնում է ադրբեջանցիների ազգային փրկության օրվա գոյությունը, որի հերթական տարեդարձը, ի դեպ, նշվեց օրեր առաջ։

Ադրբեջանի պետականության համար այս 2 փորձությունները պայմանավորված էին թե՛ 1920, եւ թե՛ 1991 թվականին Արցախի դեմ սանձազերծած պատերազմով։ Պարզ է, որ թե՛ 1920, եւ թե՛ 1990-ականների սկզբին Ադրբեջանը գերագնահատել էր իր կարողությունները եւ թերագնահատել պատերազմի կործանարար հետեւանքները։ Ես հեռու եմ այն մտքից, որ ինչ վատ է Ադրբեջանին, լավ է Հայաստանին եւ Արցախին։ 1920 թվականին Ադրբեջանի պետականության կորուստը մեզ՝ հայերիս, ոչինչ չտվեց։ Եվ առավել կարեւոր է, որ 1994 թվականին մենք՝ Հայաստանը եւ Արցախը, կարողացանք Ադրբեջանի հետ մեկտեղ հրադադար հաստատել եւ վերջ տալ պատերազմին ու կայունացնել իրավիճակը տարածաշրջանում։
Հայաստանի եւ Արցախի միասնական անվտանգության համակարգն առավել քան պատրաստ է պաշտպանելու հայ ժողովրդի անվտանգությունը մեր հայրենիքի յուրաքանչյուր հատվածում։ Ուժի կիրառումն անհետեւանք չի մնա, եւ դրան մշտապես կտրվի առավել քան համարժեք պատասխան թե՛ ռազմական, թե՛ քաղաքական հարթություններում։ Սա հասկանում է նաեւ Ադրբեջանի նախագահ Իլհամ Ալիեւը, որն, ըստ էության, ինքն իրեն դրել է փակուղու մեջ։ Ավելի քան 15 տարի նա սեփական ժողովրդին խոստացել է ռազմական ճանապարհով լուծել Ղարաբաղի հարցը, այս վերնագրի ներքո միլիարդավոր դոլարներ են ծախսվել, որոնք շատ հաճախ ուղղակի փողերի լվացման տպավորություն են գործում, որոնք, ի վերջո, հանգրվանում են օֆշորային գոտիների՝ հայտնի մարդկանց պատկանող հաշիվներին։ Ու հիմա նա չի կարողանում սեփական ժողովրդին բացատրել, թե ինչու է իրականությունն այնպիսին, ինչպիսին կա։ Նա հասկանում է, որ իր հնարավոր արկածախնդրությունն անդառնալի ավերածություններ կբերի ոչ միայն Ադրբեջանին, այլեւ կկազմաքանդի իր հակաժողովրդական իշխանությունը։ Ու մարդկանց ուշադրությունը շեղելու համար նա, այս փակուղուց դուրս գալու համար, բարձրացնում է իր հայտարարությունների ջերմաստիճանը եւ ընդգրկումը՝ անցյալի ձախողումները փորձելով կոմպենսացնել ապագայի վերաբերյալ նոր ու ավելի անհեթեթ խոստումներով։

Վերջերս էլ, Ադրբեջանի հատուկ ծառայությունների ուղղորդմամբ, այսպես կոչված, «արեւմտյան ադրբեջան» նախաձեռնություն են ստեղծել՝ նկատի ունենալով Հայաստանի Հանրապետությունը։ Սրանով Ադրբեջանի վարած տարածաշրջանային քաղաքականությունն ավելի ամբողջական է դառնում, եւ «արեւմտյան ադրբեջանի» անհեթեթ նախաձեռնությունը եկավ փոխարինելու այսպես կոչված՝ «հարավային, հյուսիսային, հյուսիս-արեւմտյան ադրբեջանների» զավեշտալի շարքը՝ ընդգծելով Ադրբեջանի ապակայունացնող նկրտումները ողջ տարածաշրջանի համատեքստում։

Բայց ես ուզում եմ հենց այս իմաստով ընդգծել, որ մենք, խոսելով ղարաբաղյան հակամարտության գոտու կայունության մասին, անվտանգության մասին, ըստ էության, խոսում ենք մեր ողջ տարածաշրջանի անվտանգության եւ կայունության մասին, եւ այս առումով Հայաստանը դառնում է ոչ միայն ղարաբաղյան հակամարտության գոտու, այլեւ մեր ողջ տարածաշրջանի անվտանգության երաշխավոր։ Այս առումով, կարծում եմ, մենք պետք է առանձնահատուկ պատասխանատվությամբ վերաբերվենք մեր այս տարածաշրջանային դերին եւ լինենք ուժեղ, ամուր, բայց եւ չտրվենք անիմաստ եւ անհեթեթ սադրանքների։
Առավել եւս այժմ, երբ մեր հասարակությունները պայքարում են գլոբալ մարտահրավերի՝ նոր կորոնավիրուսի համավարակի դեմ, մենք պետք է կոչ անենք՝ զերծ մնալ թշնամական գործողությունների քարոզից։ Ուզենք, թե չուզենք՝ պատմությունը եւ աշխարհագրությունը մեզ դարձրել են հարեւաններ, եւ մենք պետք է ելնենք այն պարզ ճշմարտությունից, որ մեր ժողովուրդներն իրավահավասար են, չեն կարող լինել մեկը մյուսի տիրապետության ներքո եւ պետք է տնօրինեն իրենց ճակատագիրն իրենց կամքի, ինքնորոշման իրավունքի համաձայն։ Այս իրավահավասարության ընդունումը մեծապես կնպաստի մեր ժողովուրդներին խաղաղության նախապատրաստմանը եւ մեր տարածաշրջանի երկարաժամկետ եւ կայուն զարգացման հուսալի հիմքեր կդնի։ Շնորհակալ եմ»։

Իր խոսքում Արցախի Հանրապետության նախագահ Արայիկ Հարությունյանը նշել է.

 «Հայաստանի Հանրապետության մեծարգո՛ վարչապետ, Հայաստանի եւ Արցախի Հանրապետությունների անվտանգության խորհուրդների հարգարժա՛ն անդամներ, քանի որ առաջին անգամ եմ մասնակցում Հայաստանի եւ Արցախի հանրապետությունների անվտանգության խորհուրդների համատեղ նիստին, նախ, կուզեի ողջունել ավանդական դարձած այս ձեւաչափը։ Այն կարեւորագույն ձեւաչափ ու հարթակ է մեր միացյալ հայրենիքի ու ընդհանրապես հայ ազգի առջեւ ծառացած անվտանգային հիմնախնդիրների լուծման ուղիների շուրջ մտքերի փոխանակման, մոտեցումների հղկման եւ ջանքերի համատեղման համար։ Արդեն նկատելի են այս ձեւաչափով աշխատանքների առաջին ձեռքբերումները, եւ համոզված եմ, որ ժամանակի ընթացքում այդպիսի ձեռքբերումներն անընդհատ ավելանալու են՝ բարձրացնելով հայրենիքի անվտանգության մակարդակը։

Հայոց միացյալ հայրենիքն այսօր ապրում է աննախադեպ անվտանգային մարտահրավերների պայմաններում, ինչը պայմանավորված է առաջին հերթին կորոնավիրուսի հարուցած անորոշություններով, իսկ անորոշությունն ինքնին գլխավոր անվտանգային սպառնալիքն է ամենուր։ Ի թիվս սովորական դարձած երկարաժամկետ ռիսկերի, այժմ մենք պարտավոր ենք ոչ միայն արդյունավետ կերպով պաշտպանել հանրության կյանքն ու առողջությունը, այլ նաեւ՝ չեզոքացնել առկա իրավիճակով պայմանավորված կողմնակի ռիսկերը բոլոր բնագավառներում։ Այդ տեսանկյունից կարեւոր եմ համարում ներդաշնակ ու միասնական աշխատանքը բոլոր հնարավոր սուբյեկտների միջեւ՝ Հայաստանի ու Արցախի հանրապետությունների գերատեսչություններից մինչեւ քաղաքացիներ ու տարբեր բնույթի կազմակերպություններ։ Վստահ եմ՝ միայն պետական լիազոր մարմինների արդյունավետ համակարգմամբ ու հասարակության հավաքական ջանքերով մենք կկարողանանք դիմագրավել առկա մարտահրավերները՝ միեւնույն ժամանակ օգտվելով ճգնաժամի ընձեռած հնարավորություններից։
Անշուշտ, կորոնավիրուսի անտեսանելի սպառնալիքի դեմ պայքարելիս չպետք է թուլացնենք մեր զգոնությունը հատկապես Ադրբեջանից բխող տեսանելի վտանգի հանդեպ։ Ադրբեջանի իշխանությունները տասնամյակներ շարունակ գոյաբանական սպառնալիք են ներկայացնում ոչ միայն Արցախի, այլեւ՝ Հայաստանի ողջ բնակչության նկատմամբ։ Կողմնակից լինելով ադրբեջանա-ղարաբաղյան հակամարտության բացառապես խաղաղ ճանապարհով կարգավորմանը՝ մենք միեւնույն ժամանակ հարկադրված ենք ամեն օր պատրաստ լինել պատերազմի։ Լինելով մեկ միասնական հայրենիքի եւ նույն անվտանգային համակարգի անբաժանելի մասերը՝ Արցախի եւ Հայաստանի հանրապետությունները լիովին կիսում են խաղաղության հասնելու եւ պատերազմի պատրաստվելու մոտեցումներն ու ջանքերը։ Դա ենթադրում է միասնական ջանքերով ե՛ւ ռազմական ներուժի շարունակական բարելավում, ե՛ւ սոցիալ-տնտեսական կարողությունների զարգացում, ե՛ւ արտաքին քաղաքական լայն գործիքակազմի կիրառում հայ ժողովրդի իրավունքների ու շահերի պատշաճ պաշտպանության նպատակով, ե՛ւ, ինչո՞ւ չէ, տեղեկատվական կամ հոգեբանական անվտանգության պատշաճ երաշխավորում։

Անվտանգության փոխազդող համակարգի գլխավոր հենասյուներից մեկն էլ պարենային ու էներգետիկ անվտանգությունն է, որտեղ եւս ձեռքբերումները նշանակալի են, սակայն նոր անելիքներ միշտ կան՝ միջավայրային մարտահրավերների եւ մեր նպատակների ու հնարավորությունների դինամիկ փոփոխությանը զուգահեռ։ Մեր խնդիրն է ապահովել հնարավորինս ինքնաբավ ու ճկուն պարենային ու էներգետիկ համակարգ բոլոր իրավիճակների համար՝ երաշխավորելու համար ռազմական ու սոցիալ—տնտեսական անվտանգության ամրությունն ու կայունությունը։ Այդ եւ մի շարք այլ առումներով ռազմավարական նշանակություն ունեն նաեւ ենթակառուցվածքները, եւ ուրախ եմ, որ համատեղ արդեն մեկնարկում ենք Արցախը մայր Հայաստանին կապող երրորդ մայրուղու շինարարությունը։
Հարգելի՛ ներկաներ, եթե հակիրճ ձեւակերպելու լինենք, Հայաստանի եւ Արցախի հանրապետությունները կամ հայոց միացյալ հայրենիքը խնդիր ունի շարունակաբար բարելավել իր ռազմավարական դիմադրողականությունն ու ազդեցությունը առկա եւ գալիք անվտանգային միջավայրերում, որպեսզի կարողանա արդյունավետորեն դիմագրավել բազմոլորտ, բազմաշերտ, բազմապիսի եւ բազմաժամկետ մարտահրավերները։ Այդ պատասխանատու գործառույթը դրված է առաջնահերթորեն անվտանգության խորհուրդներում ընդգրկված կառույցների վրա, ուստի մենք պարտավոր ենք կիրառել բոլոր արդյունավետ ձեւաչափերն ու մեթոդները մեր համազգային առաքելությունը պատվով կատարելու համար։

Բարի աշխատանքային ընթացք եմ մաղթում մեզ բոլորիս»։